பிக்பாஸ் நிகழ்ச்சியில் விக்ரமனுக்கு ஆதரவாக டிவிட்டிய தொல் திருமாவளனை விளாசியுள்ளார் நடிகை வனிதா.
விஜய் டிவியில் ஒளிபரப்பாகி வரும் பிக்பாஸ் சீசன் 6 நிகழ்ச்சி கடந்த அக்டோர் மாதம் 9 ஆம் தேதி தொடங்கியது. இதில் சின்னத்திரை பிரபலங்கள் பலரும் பங்கேற்றனர். முதல் முறையாக சாமானியர்களில் ஒருவராக ஈரோடு மாவட்டம் பவானியை சேர்ந்த தனலெட்சுமி பங்கேற்றார். இதேபோல் விடுதலை சிறுத்தைகள் கட்சியின் செய்தி தொடர்பாளரான விக்ரமன் இந்த நிகழ்ச்சியில் பங்கேற்றார்.
ஆரம்பம் முதலே நிதானமாகவும் பொறுமையாகவும் விளையாடி வருகிறார் விக்ரமன். எவ்வளவு பிரச்சனைகள் வந்தாலும் சக போட்டியாளர்கள் எந்த அளவுக்கு பொறுமையை சோதித்ததாலும் எந்த இடத்திலும் நிதானத்தை இழக்காமல் உள்ளார். மேலும் அநீதிக்கு எதிராகவும் பிக்பாஸ் வீட்டில் குரல் கொடுத்து வருகிறார் விக்ரமன். அறம் வெல்லும் என்ற ஒற்றை வரியுடன் விளையாடி வருகிறார் விக்ரமன்.
பிக்பாஸ் நிகழ்ச்சிக்கான ஃபினாலே வரும் ஞாயிற்றுக் கிழமை நடைபெறவுள்ளது. தற்போது ஃபினாலே வாரத்தில் ஃபைனலிஸ்டுகளில் ஒருவராக உள்ளார் விக்ரமன். இதேபோல் அசீம், அமுதவாணன், ஷிவின், மைனா ஆகியோரும் ஃபைனலிஸ்டுகளாக உள்ளனர். ஃபைனலில் யார் பிக்பாஸ் ட்ரோஃபியை தட்டி தூக்கப் போகிறார்கள் என்ற எதிர்பார்ப்பு எகிறியுள்ளது. குறிப்பாக அசீம்முக்கும் விக்ரமனுக்கும் கடுமையான போட்டி நிலவி வருகிறது.
சமூக வலைதளங்களில் யார் டைட்டில் வின்னர் என ரகளை செய்து வருகின்றனர் ரசிகர்கள். இந்நிலையில் விக்ரமன் சார்ந்துள்ள விடுதலை சிறுத்தைகள் கட்சியின் தலைவரான தொல் திருமாவளவன், தம்பி விக்ரமனுக்கு வாக்களித்து அவரை வெற்றி பெற செய்வோம். அவருக்கு வாக்களிப்போம், அறம் வெல்லும் என தனது டிவிட்டர் பக்கத்தில் பதிவிட்டுள்ளார். திருமாவளவனின் இந்த பதிவு தற்போது சர்ச்சையாகியுள்ளது.
திருமாவளவனின் இந்த பதிவை பலரும் விமர்சித்து வருகின்றனர். அந்த வகையில் நடிகையும் பிக்பாஸ் நிகழ்ச்சியின் முன்னாள் போட்டியாளருமான வனிதா விஜயகுமார் திருமாவளவனை விளாசியுள்ளார். திருமாவளவனின் டிவிட்டை ரீடிவிட் செய்துள்ள நடிகை வனிதா, இதற்கு நீங்கள் என்ன சொல்கிறீர்கள்… இது எல்லாம் ஒரு அரசியல் ஸ்டண்ட்… ஒரு மரியாதைக்குரிய அரசியல் தலைவர், பதவியில் இருக்கும் எம்.பி.யும், ரியாலிட்டி ஷோவில் போட்டியிடும் போட்டியாளருக்கு வாக்களிக்க தனது உறுப்பினர்களை எப்படி நிர்ப்பந்திக்கலாம் என கேட்டுள்ளார்.
மேலும் தனது மற்றொரு தொடர்ச்சியான பதிவில், அவர்களின் வேட்பாளர் என்பதால்தான்.. மிகவும் புத்திசாலித்தனமான அரசியல் நாடகம்… பொதுமக்களின் அன்பு மற்றும் பாசத்துடன் விளையாடுவதற்கு மைண்ட் கேம்களைப் பயன்படுத்துகின்றனர் என்று பதிவிட்டுள்ள வனிதா, அதில் நிகழ்ச்சியின் தொகுப்பாளரான கமல்ஹாசனின் டிவிட்டர் ஹேண்டிலை டேக் செய்துள்ளார். வனிதாவின் இந்த துணிச்சலான பதிவுகளை பார்த்த நெட்டிசன்கள் அவரை பாராட்டி வருகின்றனர்.
